సిఎంపై కాంగ్రెసుదే నిర్ణయం: పవార్

న్యూఢిల్లీ: మహారాష్ట్ర కొత్త ముఖ్యమంత్రిపై కాంగ్రెసు పార్టీయే నిర్ణయం తీసుకుంటుందని ఎన్సీపి చీఫ్ శరద్ పవార్ స్పష్టం చేశారు. అశోక్ చవాన్ తిరిగి ముఖ్యమంత్రి అవుతారా అని మీడియా ప్రతినిధులు అడిగితే కాంగ్రెసు నిర్ణయించుకుంటుందని ఆయన జవాబిచ్చారు. శివసేన - బిజెపి కూటమి ఓటర్లను ఆకట్టుకోవడంలో విఫలమయ్యాయని ఆయన గురువారం మీడియా ప్రతినిధులతో అన్నారు. గ్రామీణ మహారాష్ట్రలో ఎన్సీపికి లభించిన స్పందనకు తాను ఎంతో సంతోషిస్తున్నానని ఆయన చెప్పారు. ఈ ఫలితాలను తాను ఊహించలేదని ఆయన అన్నారు.

ముఖ్యమంత్రి పదవి కోసం పట్టుబడతారా అని అడిగితే కాంగ్రెసు - ఎన్సీపి కూటమి ప్రభుత్వం ఏర్పడాలని అందరూ కోరుకుంటున్నారని, తమ మధ్య సంబంధాలు సామరస్యపూర్వకంగా ఉంటాయని ఆయన జవాబిచ్చారు. ముఖ్యమంత్రి పదవిని రోటేషన్ పద్ధతిలో చేపట్టాలని ఎన్సీపి నేత ఛగన్ భుజబల్ అన్నారు. అయితే ఇది తన వ్యక్తిగత అభిప్రాయమని, తుది నిర్ణయం మాత్రం పవార్ తీసుకుంటారని ఆయన చెప్పారు.