రాష్ట్రంలో రాజకీయ అస్థిరత: బంగారు లక్మణ్

కడప: రాష్ట్రంలో రాజకీయ అస్థిరత నెలకొన్నదని భారతీయ జనతా పార్టీ (బిజెపి) సీనియర్ నేత బంగారు లక్ష్మణ్ అభిప్రాయపడ్డారు. మతపరమైన రిజర్వేషన్లపై ఏర్పాటైన సదస్సుకు వచ్చిన ఆయన శనివారం మీడియా ప్రతినిధులతో మాట్లాడారు. రాష్ట్ర కాంగ్రెసులో వచ్చే కొన్నాళ్లలో అసమ్మతి పొగలు సెగలు బయట పడే అవకాశం ఉందని ఆయన అన్నారు.

రాష్ట్ర ప్రభుత్వం ఇచ్చిన ఎన్నికల హామీలను అమలు చేయడం లేదని, ఆ విషయాన్ని కడప పార్లమెంటు సభ్యుడు వైయస్ జగన్ కూడా చెప్పారని ఆయన అన్నారు. రైతులకు 9 గంటల విద్యుత్తు, కుటుంబానికి 30 కిలోల బియ్యం సరఫరా, తెల్ల రేషన్ కార్డులు వంటి హామీలు అమలు కావడం లేదని జగన్ చెప్పారని ఆయన గుర్తు చేశారు. మూడు రాష్ట్రాల ఎన్నికల ఫలితాలను బట్టి కాంగ్రెసు బలం తగ్గినట్లు తెలుస్తోందని ఆయన అన్నారు.