నాగా బాలిక హత్య: ఐఐటి విద్యార్థి అరెస్టు

న్యూఢిల్లీ: నాగాలాండ్ కు చెందిన 19 ఏళ్ల బాలిక హత్య కేసులో పోలీసులు ఢిల్లీ ఐఐటి విద్యార్థిని అరెస్టు చేశారు. నాగాలాండ్ బాలిక న్యూఢిల్లీలో హత్యకు గురైంది. ఆమె శవం ఆదివారం కనిపించింది. మునిర్కా గ్రామంలోని తన సోదరిని చూడడానికి అఫీ అనే ఆ బాలిక రెండు నెలల క్రితం ఢిల్లీకి వచ్చింది. ఈ కేసులోని నిందితుడు 34 ఏళ్ల పుష్కర్ సిన్హా తన నేరాన్ని అంగీకరించాడని, అతను బాలిక ఉండే ఇంటికి పొరుగునే ఉంటున్నాడని పోలీసులు చెప్పారు.

అతను ఆ బాలికను కొంత కాలంగా వేధిస్తున్నాడని, అమె వెంట పడుతున్నాడని, దాంతో ఆ బాలిక భయపడిపోయిందని బాలిక మిత్రురాలు ఒకామె చెప్పింది. ఆ బాలికను తొలుత హత్య చేసి ప్రమాదంలో మరణించినట్లుగా చిత్రీకరించినట్లు పోస్టు మార్టంలో తేలినట్లు పోలీసులు తెలిపారు. ఈశాన్య రాష్ట్రాలకు చెందిన మహిళలపై ఇలాంటి ఘాతుకాలు కొత్తేమీ కాదు. గతంలో పలు ఘటనలు జరిగాయి.