'రక్త చరిత్ర' లో ఎన్టీఆర్ గా శతృఘ్న సిన్హా

న్యూఢిల్లీ: హత్యకు గురైన తెలుగుదేశం నాయకుడు పరిటాల రవీంద్ర జీవితచరిత్ర ఆధారంగా ప్రముఖ దర్శకుడు రామ్‌ గోపాల్‌ వర్మ తెలుగు, తమిళం, హిందీ భాషల్లో తెరకెక్కిస్తున్న 'రక్తచరిత్ర' చిత్రంలో ఎన్టీఆర్‌ పాత్రకు బాలీవుడ్‌ షాట్‌గన్‌, భాజపా ఎంపీ శత్రుఘ్నసిన్హా ఎంపికయ్యారు. ఈ విషయాన్ని ఆయనే స్వయంగా వెల్లడించారు.

ఈ చిత్రం హిందీ వెర్షన్‌లో ఆయన ఎన్టీఆర్‌ పాత్రను పోషిస్తారు. తెలుగు వెర్షన్ లో మోహన్ బాబు ఎన్టీఆర్ గా నటిస్తున్న విషయం తెలిసిందే. రక్తచరిత్ర మహాభారత గాథను పోలి ఉంటుందని శత్రుఘ్నసిన్హా చెప్పారు. ఎన్టీఆర్‌ లాంటి మహానటుడి పాత్రలో నటించడం సవాలేనని వ్యాఖ్యానించారు. ప్రేక్షకులను మెప్పించేందుకు శక్తివంచన లేకుండా కృషి చేస్తానన్నారు. రాజకీయ కార్యకలాపాలతో తీరిక చిక్కడం లేదని, అయినా సినిమాల పట్ల తనకు మక్కువ తగ్గలేదన్నారు.

"రక్త చరిత్ర" షూటింగ్ ప్రస్తుతం హైదరాబాద్ పరిసరాల్లో జరుగుతోంది. రాయలసీమ ఫ్యాక్షనిస్టుల నుంచి బెదిరింపులు ఉన్నందువల్ల సాధ్యమైనంత వరకు రాయలసీమ్ వెలుపలే షూట్ చేయాలని నిర్ణయించుకున్నట్టు తెలుస్తోంది. సీమ ముఠాలు షూటింగ్ కు అడ్డు పడకుండా ప్రైవేటు సైన్యం సేవలను వినియోగిస్తున్నారు.