కెసిఆర్ పై లగడపాటి ఫ్రీజోన్ లడాయి

విజయవాడ: హైదరాబాద్ ఫ్రీజోన్ వ్యవహారంపై ఆందోళన చేస్తున్న తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుపై కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ ధ్వజమెత్తారు. మీడియా ద్వారా ప్రచారం పొందేందుకే కెసిఆర్ ఫ్రీజోన్ వ్యవహారంపై రాద్ధాంతం చేస్తున్నారని ఆయన బుధవారం మీడియా ప్రతినిధుల సమావేశంలో విరుచుకుపడ్డారు. ప్రజల్లోకి వెళ్లి పోరాటం చేయడానికి బదులు ప్రచారం కోసం మీడియా ద్వారా కెసిఆర్ ప్రయత్నాలు చేస్తున్నారని ఆయన వ్యాఖ్యానించారు.

హైదరాబాద్ ఫ్రీజోన్ వ్యవహారంపై ప్రభుత్వం రివ్యూ పిటిషన్ వేయాల్సిన అవసరం లేదని ఆయన అన్నారు. హైదరాబాద్ ను ఫ్రీజోన్ గా ప్రకటించకపోతేనే మంచిదని ఆయన అన్నారు. ఎప్పటిలాగే ఉంటే సరిపోతుందని ఆయన అభిప్రాయపడ్డారు. పోలీసుల బదిలీలు డిజిపి ద్వారా జరిగితే బాగుంటుందని ఆయన అన్నారు. మనుగడ కోసం కెసిఆర్ ఫ్రీజోన్ వ్యవహారాన్ని ఎత్తుకున్నారని ఆయన వ్యాఖ్యానించారు.