వైయస్ ఆశయాల సాధనకు కృషి: రోశయ్య

హైదరాబాద్: దివంగత నేత వైయస్ రాజశేఖర రెడ్డి ఆశయాల సాధనకు కృషి చేయాలని ముఖ్యమంత్రి కె. రోశయ్య ప్రజలకు పిలుపునిచ్చారు. ఆయన బుధవారం హైదరాబాదులోని వివిధ ప్రాంతాల్లో పర్యటించి, అభివృద్ధి పనులకు శ్రీకారం చుట్టారు. వైయస్ హయాంలోనే రాష్ట్రం పారిశ్రామిక రంగంలో విశేష ప్రగతి సాధించిందని ఆయన చెప్పారు. గ్రేటర్ హైదరాబాద్ ఎన్నికల నేపథ్యంలో ఆయన హైదరాబాదులో చేసిన సుడిగాలి పర్యటన ప్రాధాన్యం సంతరించుకుంది. ముఖ్యమంత్రిగా బాధ్యతలు చేపట్టిన తర్వాత ఆయన నగరంలో పర్యటన జరపడం ఇదే తొలిసారి.

హైదరాబాదులోని పది ప్రాంతాల్లో ఆయన పర్యటించారు. సికింద్రాబాదులోని ఈస్ట్ మారేడుపల్లిలోని ఈసిఎస్ నగర్ లో జెఎన్ఎన్యుఆర్ఎం హౌసింగ్ స్కీమ్ కు శంకుస్థాపన చేశారు. చిలకలగుడాలో రిజర్వాయర్ ప్రారంభించారు. హైదరాబాదులోని చంచల్ గుడాలో కూడా రిజర్వాయర్ ప్రారంభించారు. మాదాపూర్ లోని కావూరి హిల్స్ లో రోడ్డు విస్తరణ పనులకు శంకుస్థాపన చేశారు. మాదాపూర్ - రహీజా పార్క్ రోడ్డు నిర్మాణానికి భూమి పూజ చేశారు.