నాకివ్వనప్పుడు నేనెలా అడుగుతా: రోశయ్య

హైదరాబాద్: మంత్రి పదవికి రాజీనామా చేస్తూ కొండా సురేఖ లేఖను తనకివ్వనప్పుడు రాజీనామాను ఉపసంహిరించుకోవాలని తాను ఎలా అడుగుతానని ముఖ్యమంత్రి కె.రోశయ్య అడిగారు. మంత్రిగా కొండా సురేఖ రాజీనామాపై ఆయన శుక్రవారం మీడియా ప్రతినిధుల వద్ద ప్రతిస్పందించారు. మానసిక వేదనతోనే కొండా సురేఖ రాజీనామా చేశారని ఆయన అన్నారు. ఆమె తనపై వ్యతిరేకతతో రాజీనామా చేయలేదని ఆయన అన్నారు.

కొండా సురేఖ రాజీనామా విషయాన్ని గవర్నర్ తనకు తెలియజేశారని, దాన్ని ఆమోదించాలని తాను గవర్నరుకు సిఫార్సు చేశానని ఆయన చెప్పారు. కొండా సురేఖ రాజీనామా ప్రభావం గ్రేటర్ ఎన్నికలపై ఉండదని ఆయన అభిప్రాయపడ్డారు. సురేఖ రాజీనామా విషయం తెలుసుకున్న పలువురు నేతలు శుక్రవారం ఉదయమే ముఖ్యమంత్రిని కలుసుకున్నారు.