సురేఖ రాజీనామాకు రోశయ్య ఆమోదం

హైదరాబాద్: మంత్రి పదవికి కొండా సురేఖ చేసిన రాజీనామాను ముఖ్యమంత్రి కె.రోశయ్య శుక్రవారం ఆమోదించారు. కాంగ్రెసు పార్టీ అధిష్టానం సూచన మేరకే రోశయ్య ఆమె రాజీనామాను ఆమోదించినట్లు సమాచారం. సురేఖను పిలిపించి మాట్లాడడం వల్ల ప్రయోజనం ఏమీ లేదని భావించిన రోశయ్య రాజీనామాను ఆమోదించడమే మేలనే అభిప్రాయానికి వచ్చినట్లు తెలుస్తోంది. రాజీనామాను నేరుగా గవర్నరుకు కాకుండా తనకు సమర్పిస్తే మాట్లాడేందుకు అవకాశం ఉండేదని, ఆమె నేరుగా గవర్నరుకు సమర్పించినందున మాట్లాడడం వల్ల ప్రయోజనం ఉండదని భావించినట్లు తెలుస్తోంది. సురేఖ రాజీనామా ద్వారా పార్టీ అధిష్టానానికి జగన్ వర్గం తిరుగుబాటు సంకేతాలిచ్చిందని, ఇటువంటి బెదిరింపులకు లొంగబోమని చెప్పడానికే రోశయ్య ద్వారా రాజీనామాను ఆమోదింపజేసినట్లు భావిస్తున్నారు.

కాంగ్రెసు సీనియర్ నేత వి.హనుమంతరావు శుక్రవారం ఉదయం రోశయ్యను కలిశారు. ఈ బేటీ ముగిసిన వెంటనే రోశయ్య సురేఖ రాజీనామాను ఆమోదించారు. గురువారం రాత్రే రోశయ్య, పిసిసి అధ్యక్షుడు డి. శ్రీనివాస్ కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీతో సుదీర్ఘంగా మాట్లాడారు. సురేఖ రాజీనామా చేస్తారని ఊహించిందేనని మొయిలీ అన్నారు. దీన్ని బట్టి జగన్ కదలికలను ఎప్పటికప్పుడు తెలుసుకుంటూ తిప్పికొట్టేందుకు సిద్ధపడినట్లు చెబుతున్నారు.