సురేఖది క్రమశిక్షణా ఉల్లంఘన: సత్యనారాయణ రాజు

హైదరాబాద్: మంత్రి పదవికి రాజీనామా చేసిన కొండా సురేఖ పార్టీ క్రమశిక్షణను ఉల్లంఘించారని ప్రదేశ్ కాంగ్రెసు కమిటీ (పిసిసి) క్రమశిక్షణా సంఘం అధ్యక్షుడు సత్యనారాయణ రాజు అన్నారు. సురేఖపై క్రమశిక్షణా చర్యలు తీసుకుంటామని, ఈ విషయాన్ని పార్టీ అధిష్టాన వర్గానికి నివేదిస్తామని ఆయన శుక్రవారం మీడియా ప్రతినిధుల సమావేశంలో చెప్పారు. గవర్నరుకు రాజీనామా చేసి సురేఖ అలజడి సృష్టించడం సరైంది కాదని ఆయన అన్నారు.

రాజీనామాను సురేఖ ముఖ్యమంత్రికి కాకుండా గవర్నరుకు సమర్పించడం క్రమశిక్షణా ఉల్లంఘన కిందికే వస్తుందని ఆయన అన్నారు. కొండా సురేఖ వెన్నుపోటు పొడిచినట్లుగానే భావిస్తామని ఆయన అన్నారు. గ్రేటర్ హైదరాబాద్ ఎన్నికలు వచ్చిన తరుణంలో కలిసికట్టుగా పనిచేయాల్సి ఉందని, ఈ సమయంలో సురేఖ వ్యవహారం సరైంది కాదని ఆయన అన్నారు. కలిసికట్టుగా పనిచేస్తే వైయస్ జగన్ కు మేలు చేసినవారై ఉండేవారని ఆయన అన్నారు.