జగన్ ప్రచారం చేస్తే మంచిది: విహెచ్

హైదరాబాద్: గ్రేటర్ హైదరాబాద్ ఎన్నికల్లో కడప పార్లమెంటు సభ్యుడు వైయస్ జగన్ ప్రచారం చేస్తే మంచిదని కాంగ్రెసు సీనియర్ నేత వి. హనుమంతరావు అన్నారు. ఆయన శనివారంనాడు హైదరాబాదులోని లేక్ వ్యూ అతిథి గృహంలో కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీని కలిశారు. దివంగత నేత వైయస్ రాజశేఖర రెడ్డికి ఉన్న ఇమేజ్ మరెవరికీ లేదని ఆయన అన్నారు. వైయస్ రాజశేఖర రెడ్డి బాటలో నడిచి గ్రేటర్ హైదరాబాద్ ఎన్నికల్లో కాంగ్రెసుకు విజయం చేకూర్చి పెట్టాల్సిన అవసరం ఉందని ఆయన అన్నారు.

గ్రేటర్ హైదరాబాద్ ఎన్నికల్లో కాంగ్రెసు విజయం ఉమ్మడి బాధ్యత అని ఆయన అన్నారు. తాను హైదరాబాదులో ప్రచారం చేస్తానని ఆయన చెప్పారు. గ్రేటర్ హైదరాబాదు ఎన్నికల్లో పార్టీ శ్రేణులన్నీ బాధ్యత వహిస్తాయని ఆయన చెప్పారు. తాను మేయర్ పదవికి రేసులో లేనని ఆయన చెప్పారు. వీరప్ప మొయిలీతో గ్రేటర్ హైదరాబాద్ ఎన్నికల్లో పార్టీ వ్యూహం, పార్టీ టికెట్ల ఎంపికపై చర్చించినట్లు ఆయన తెలిపారు.