చిరు పార్టీ కింగ్ మేకర్: జోగయ్య

హైదరాబాద్: గ్రేటర్ హైదరాబాదులో తామే కింగ్ మేకర్స్ అవుతామని ప్రజారాజ్యం పార్టీ నాయకుడు చేగొండి హరిరామ జోగయ్య అన్నారు. చిరంజీవి నాయకత్వంలోని తమ పార్టీ గ్రేటర్ హైదరాబాద్ ఎన్నికల్లో 110 స్థానాలకు పోటీ చేస్తుందని ఆయన శనివారం మీడియా ప్రతినిధుల సమావేశంలో చెప్పారు. తమకు 40 డివిజన్లలో గట్టి అభ్యర్థులున్నారని ఆయన చెప్పారు. తాము 20 నుంచి 30 డివిజన్లు నెగ్గినా కార్పోరేషన్ ను ఒక ఆట ఆడిస్తామని ఆయన ధీమా వ్యక్తం చేశారు.

గ్రేటర్ హైదరాబాద్ ఎన్నికల్లో పలు పార్టీలు పోటీ పడుతున్నందున ఏ పార్టీకి కూడా 50కి మించి సీట్లు రావని ఆయన అభిప్రాయపడ్డారు. పొత్తు కోసం తెలుగుదేశం, కాంగ్రెసు పార్టీల నుంచి సంకేతాలు అందుతున్నాయని ఆయన చెప్పారు. పొత్తుల కోసం తమంతట తాము పరుగులు తీయబోమని ఆయన చెప్పారు. తమ అవసరం ఉందనుకున్నవారితోనే కలుస్తామని ఆయన చెప్పారు.