చిరుతో పొత్తు విషయం తెలియదు: దానం

హైదరాబాద్‌ : గ్రేటర్‌ హైదరాబాద్ ఎన్నికల్లో ప్రజారాజ్యంతో పొత్తు అంశం తన దృష్టికి రాలేదని ఈ విషయం పీసీసీ అధ్యక్షుడు డి.శ్రీనివాస్‌ పరిధిలో ఉంటుందని గ్రేటర్‌ హైదరాబాద్‌ కాంగ్రెస్‌ అధ్యక్షుడు, ఆరోగ్య శాఖ మంత్రి దానం నాగేందర్‌ తెలిపారు. గ్రేటర్‌ ఎన్నికలపై ఆయన డీఎస్‌తో చర్చించారు. అనంతరం విలేకరులతో మాట్లాడుతూ అభ్యర్థుల ప్రక్రియ ఇంకా పూర్తి కాలేదని వెల్లడించారు.

కాంగ్రెస్- ప్రజారాజ్యం పార్టీల మధ్య పొత్తు కుదరనుందని వార్తలు వచ్చాయి. ఈ పొత్తు కోసమే చిరంజీవి కేరళ పర్యటన ముగించుకుని వస్తున్నారు. కాంగ్రెస్ పార్టీ ఈ ఎన్నికల్లో పాతిక నుంచి ముప్పై స్ధానాలు ప్రజారాజ్యానికి ఇవ్వడానికి సిద్ధంగా ఉన్నట్టు తెలుస్తోంది. చిరంజీవి అంతకంటే కొన్ని ఎక్కువ స్ధానాలు అడిగే అవకాశముంది.