చెంపలేసుకున్న కరీనా, సైఫ్

ముంబయ్: మాంసాహారం, మద్యం, పొగాకు ఉత్పత్తుల ప్రకటనల్లో తాను నటించే ప్రసక్తేలేదని బాలీవుడ్‌ హీరోయిన్‌ కరీనాకపూర్‌ చెబితే, లోదుస్తులకు తాను ప్రచారకర్తగా ఉండబోనని ఆమె ప్రియుడు సైఫ్‌ అలీఖాన్‌ అంటున్నాడు. హిందుస్థాన్‌ టైమ్స్‌ సంస్థ నిర్వహించిన నాయకత్వ సదస్సులో ఈ బాలీవుడ్‌ లవ్‌ జంట తమ అభిప్రాయాలను వెల్లడించారు. పెళ్లి చేసుకుంటే కెరీర్‌ దెబ్బతింటుందన్న భయంతో.. ఇప్పుడప్పుడే పెళ్లికి తొందరలేదని కూడా వారిద్దరూ చెబుతున్నారు. రెండేళ్ల క్రితం ప్రేమలో పడినప్పటి నుంచి వీళ్ల పెళ్లి గురించిన వదంతులు వస్తూనే ఉన్నాయి.

సైఫ్‌కు సొంత నిర్మాణసంస్థ ఏర్పాటుచేయాలని, తనకు గొప్ప పాత్రలు చేయాలని ఉన్నందువల్ల అప్పుడే పెళ్లి గురించి ఆలోచించట్లేదని బెబో చెప్పింది. ఇటీవలే 'లవ్‌ ఆజ్‌ కల్‌' సినిమాతో నిర్మాతగా మారిన సైఫ్‌ కూడా తన ప్రేయసి మాటలకు తందానా అన్నాడు. నటిగా తన కెరీర్‌లో అగ్రస్థానంలో ఉన్న ఓ అమ్మాయిని ఉన్నట్టుండి గృహిణిగా మార్చేయడం సబబు కాదని అతగాడు చెప్పాడు.