వైయస్ పేరిట కొత్తగా కాంగ్రెస్ పార్టీ ఏర్పాటు

హైదరాబాద్: దివంగత ముఖ్యమంత్రి వైయస్ రాజశేఖర్‌ రెడ్డి ఆశయాల సాధనకు నూతనంగా వైయస్ ఆర్‌ కాంగ్రెస్‌ పార్టీని ఏర్పాటు చేసినట్లు ఆ పార్టీ రాష్ట్ర అధ్యక్షుడు, కడపజిల్లా కాంగ్రెస్‌ కమిటీ మాజీ ప్రధాన కార్యదర్శి మహబూబ్‌ బాషా తెలిపారు. శుక్రవారం ముషీరాబాద్‌లోని పార్టీ కార్యాలయంలో ఏర్పాటు చేసిన విలేఖరుల సమావేశంలో ఆయన మాట్లాడుతూ ఇటీవలనే పార్టీని రిజిస్ట్రేషన్‌ చేయించినట్లు పేర్కొన్నారు.

గ్రేటర్‌ ఎన్నికల్లో ఇండిపెండెంట్‌ గా పోటీ చేసే అభ్యర్థుల వివరాలను సేకరించి వైఎస్‌ఆర్‌ ఆశయాల సాధన కోసం పని చేసే విధంగా కృషి చేస్తున్నామని పేర్కొన్నారు. విలేఖరుల సమావేశంలో పార్టీ రాష్ట్ర ప్రధాన కార్యదర్శి కె.ఆనంద్‌ కుమార్‌, నాగార్జున శర్మ తదితరులు పాల్గొన్నారు. వైయస్ జగనే స్వయంగా వైయస్ ఆర్ కాంగ్రెస్ పార్టీని వ్యవస్ధాపిస్తారని వదంతులు వస్తున్న నేపధ్యంలో మహబూబ్ బాషా ఈ పనిచేశారు.