హైకోర్టులో దినకరన్ పై లాయర్ల నిరసన

న్యూఢిల్లీ: కర్నాటక ప్రధాన న్యాయమూర్తి పిడి దినకరన్ రాజీనామాను డిమాండ్ చేస్తూ సోమవారం దాదాపు 50 వేల మంది న్యాయవాదులు కోర్టును బహిష్కరించారు. దీంతో కర్నాటక హైకోర్టులో కార్యకలాపాలు స్తంభించాయి. దినకరన్ కు వ్యతిరేకంగా న్యాయవాదులు నినాదాలు చేశారు. న్యాయవాదులు మీడియా ప్రతినిధిపై కూడా దాడి చేశారు. ఆరోపణల నుంచి విముక్తి లభించే వరకు దినకరన్ విధులకు హాజరు కాకూడదని న్యాయవదాలు సంఘం ఈ నెల 17వ తేదీన డిమాండ్ చేసింది.

న్యాయవాదుల ఆందోళనతో దినకరన్ తాను జరుపుతున్న విచారణను వాయిదా వేసి కోర్టు నుంచి వెళ్లిపోవాల్సి వచ్చింది. మౌనం అంగీకారం కాదని గుర్తించాలని దినకరన్ అన్నారు. తాను చేసిన తప్పేమిటో చెప్పాలని ఆయన డిమాండ్ చేశారు. తాను నెరవేర్చాల్సిన కార్యాలున్నాయని, వాటిని తాను నిర్లక్ష్యం చేయాలా అని ఆయన అన్నారు. దినకరన్ పై అవినీతి ఆరోపణలు, భూ ఆక్రమణ ఆరోపణలు వచ్చాయి.