'ఎడ్వినా, నెహ్రూలది అమలినం కాదు'

పారిస్: ఎడ్వినా, నెహ్రూల మధ్య ఉన్నది కేవలం అమలిన శృంగారం మాత్రమే కాదని వారి ప్రేమ వ్యవహారంపై నవల రాసిన కాథరిన్ క్లెమెంట్ అన్నారు. వీరిద్దరి సంబంధాలపై సినిమా ఇండియన్ సమ్మర్ అనే సినిమాపై ప్రభుత్వం సెన్సార్ విధించే ప్రయత్నం చేస్తోంది. ఈ స్థితిలో క్లెమెంట్ ఆ వ్యాఖ్య చేశారు. కాథరిన్ ఎడ్వినా అండ్ నెహ్రూ - ఎ నావెల్ అనే పుస్తకాన్ని 1993లో రాశారు. తన సంబంధం చాలా వరకు అమలిన శృంగారమేనని ఎడ్వినా మౌంట్ బాటెన్ కు రాసిన లేఖల్లో అన్నారని, దాన్ని బట్టే అది ఎల్లవేళలా అమలిన శృంగారం కాదని తెలుస్తోందని కాథరిన్ అన్నారు.

వారిద్దరి ప్రేమ వ్యవహారంపై తీస్తున్న సినిమా విషయంలో భారత ప్రభుత్వం అనవసరమైన జోక్యం చేసుకుంటోందని కాథరిన్ ఒక ఆంగ్లదిన పత్రికతో అన్నారు. వారి మధ్య సంబంధాన్ని లేఖల ఆధారంగా, ప్రత్యక్ష సాక్షులు వెల్లడించిన విషయాల ద్వారా డాక్యుమెంట్ చేయదలుచుకుంటే అభ్యంతరం ఎందుకని క్లెమెంట్ అన్నారు. సోనియా ఆ విషయంలో అభ్యంతరం తెలుపుతున్నట్లు లేరని కాథరిన్ అన్నారు.