మధు కొడా ముఖ్య అనుచరుడి లొంగుబాటు

రాంచీ: హవాలా కుంభకోణం, అక్రమ పెట్టుబడుల కేసులో జార్ఖండ్ మాజీ ముఖ్యమంత్రి మధు కొడా ముఖ్య అనుచరుడు దేవేంద్ర ముఖియా ఆదాయం పన్ను శాఖ అధికారుల ముందు సోమవారం లొంగిపోయాడు. రెండు వేల కోట్ల రూపాయల హవాలా స్కామ్, అక్రమ పెట్టుబడుల కేసులో ముఖియా ఈ నెల 6వ తేదీన గడువు మేరకు విచారణ నిమిత్తం ఐటి అధికారుల ముందు హాజరు కాలేదు. దీంతో అతను సోమవారం ఐటి అధికారుల ముందు లొంగిపోయాడు.

కాగా, ఈ నెల 13వ తేదీన తమ ముందు హాజరు కావాలని ఎన్ ఫోర్స్ డిపార్ట్ మెంట్ మధు కోడాను ఆదేశించింది. మధు కొడాను ఐటి అధికారులు రేపు విచారించనున్నారు. ఈ కేసులోని మరో ముగ్గురిపై అరెస్టు వారంట్ జారీ చేయడానికి ఐటి శాఖ సమాయత్తమవుతోంది. ఈ నెల 6వ తేదీన ఐటి అధికారుల ముందు వినోద్ సిన్హా, సంజయ్ కుమార్ చౌదరి, మనోజ్ పునామియా హాజరు కావాల్సి ఉండింది. అయితే వారు హాజరు కాలేదు. దీంతో వారిపై అరెస్టు వారంట్ జారీ చేసేందుకు రంగం సిద్ధమవుతోంది.