నేను భూకబ్జాదారుడిని కాను: ఆదాల

హైదరాబాద్: తాను భూకబ్జాదారుడిని కానని శాసనసభ్యుడు ఆదాల ప్రభాకర్ రెడ్డి అన్నారు. తాను అసైన్డ్ భూములు కొనుగోలు చేసిన మాట వాస్తవమేనని, అయితే అవి ప్రస్తుతం ప్రభుత్వ స్వాధీనంలో ఉన్నాయని, తన స్వాధీనంలో లేవని ఆయన మంగళవారం మీడియా ప్రతినిధుల సమావేశంలో స్పష్టం చేశారు. తాను బాచుపల్లిలో 12 ఏళ్ల క్రితం 20 ఎకరాల భూములను కొన్నానని, మిగతా వారు 15 ఎకరాలు ఇతరులు కొన్నారని, మొత్తం 35 ఎకరాలు అసైన్డ్ భూములు ప్రభుత్వ స్వాధీనంలో ఉన్నాయని ఆయన చెప్పారు.

తాను కొన్నప్పుడు అసైన్డ్ భూములని తనకు తెలియదని, 2006 - 07లో తమకు ఆ విషయం తెలిసిందని ఆయన చెప్పారు. తన ప్రత్యర్థులు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు తప్పుడు సమాచారం ఇచ్చారని ఆయన అన్నారు. దళితుల కోసం ఏ పార్టీ పోరాటం చేసినా తాను సమర్థిస్తానని, ఆ భూములను దళితులకు పంచితే సంతోషమేనని ఆయన అన్నారు. అసైన్డ్ భూములని తెలిసిన తర్వాత వాటిని తాను వదులుకున్నట్లు ఆయన తెలిపారు. తనపై కుట్ర చేస్తున్నావారెవరనేది సమయం వచ్చినప్పుడు తాను వెల్లడిస్తానని ఆయన చెప్పారు.