కాంగ్రెసు అవినీతి మయం: బాబు

హైదరాబాద్: కాంగ్రెసు అవినీతి కూపంగా మారిందని తెలుగుదేశం పార్టీ అధ్యక్షుడు నారా చంద్రబాబు నాయుడు విమర్శించారు. అవినీతిలో కూరుకుపోయిన కాంగ్రెసును ఓడించాలని ఆయన హైదరాబాద్ ప్రజలకు పిలువునిచ్చారు. గ్రేటర్ హైదరాబాద్ ఎన్నికల ప్రచారంలో భాగంగా ఆయన శుక్రవారం సాయంత్రం మూసాపేట ర్యాలీలో ప్రసంగించారు. చిన్న పార్టీలకు ఓటేయవద్దని, వాటికి ఓటేస్తే మురిగిపోతాయని ఆయన ప్రజారాజ్యం, లోకసత్తా పార్టీలను ఉద్దేశించి అన్నారు. గ్రేటర్ హైదరాబాద్ ఎన్నికల్లో తెలుగుదేశం పార్టీని గెలిపించాలని ఆయన ప్రజలను కోరారు.

హైదరాబాదు తెలుగుదేశం ప్రభుత్వ హయాంలో అభివృద్ధి అయిందని, కాంగ్రెసు హైదరాబాద్ అభివృద్ధిని పట్టించుకోలేదని ఆయన అన్నారు. అంతర్జాతీయ విమానాశ్రయం వంటి అనేక అభివృద్ధి కార్యక్రమాలను తాము చేపట్టామని ఆయన చెప్పారు. తాము పేదల పక్షాన నిలబడతామని ఆయన చెప్పారు. ఎస్సీ, ఎస్టీ, మైనారిటీలకు మేలు జరగాలంటే తెలుగుదేశం పార్టీ గెలవాల్సిన అవసరం ఉందని ఆయన అన్నారు.