ఎమ్మెల్యేను కిడ్నాప్ చేసిన మావోలు

రాంచీ: జార్ఖండ్ లో మానికకు చెందిన రాష్ట్రీయ జనతా దళ్ (ఆర్జెడీ) శాసనసభ్యుడిని మావోస్టులు గురువారం రాత్రి కిడ్నాప్ చేశారు. ఈ కిడ్నాప్ ఉదంతాన్ని జార్ఖండ్ డిజిపి ఒక న్యూస్ చానెల్ తో మాట్లాడుతూ ధ్రువీకరించారు. లతేహార్ నుంచి మానిక శాసనసభ్యుడు రామచందర్ సింగ్ ను నక్సలైట్లు కిడ్నాప్ చేశారు. ఆయనతో పాటు ఆయన అనుచరుడు సురేష్ యాదవ్ ను కూడా నక్సలైట్లు పహరించుకుపోయారు.

మరో ఐదుగురిని కూడా నక్సలైట్లు తమ వెంట తీసికెళ్లారు. అయితే వారిని తర్వాత వదిలేశారు. శాసనసభ్యుడి ఆచూకీ కోసం పోలీసులు గాలింపు చర్యలు చేపట్టారు. ఇంత వరకు నక్సలైట్ల నుంచి ఏ విధమైన డిమాండ్లు వెలువడలేదు. శాసనసభ్యుడి మొబైల్ ఫోన్ ఆపు చేసి ఉన్నట్లు తెలుస్తోంది.