తెరాస ఎమ్మెల్యే హరీష్ రావు అరెస్టు

మెదక్: మెదక్ జిల్లాలోని రాఘవాపూర్ భూ వివాదంపై తెలుగుదేశం నాయకులతో బహిరంగ చర్చ కోసం బయలుదేరిన తెలంగాణ రాష్ట్ర సమితి (తెరాస) శాసనసభ్యుడు హరీష్ రావును పోలీసులు శనివారం అరెస్టు చేశారు. రాఘవాపూర్ లో హరీష్ రావు దళితుల భూములను ఆక్రమించుకున్నారని తెలుగుదేశం శాసనసభ్యుడు మైనంపల్లి హనుమంతరావు శుక్రవారం ఆరోపించారు. ఈ ఆరోపణపై బహిరంగ చర్చకు సిద్ధం కావాలని హరీష్ రావు చేసిన సవాల్ కు హనుమంతరావు సిద్ధపడ్డారు. బహిరంగ చర్చను రాఘవాపూర్ లో శనివారం 11 గంటలకు తలపెట్టారు. దీని కోసం బయలుదేరిన హరీష్ రావును పోలీసులు అదుపులోకి తీసుకున్నారు.

హరీష్ రావును అదుపులోకి తీసుకునే సమయంలో పోలీసులకు, తెరాస కార్యకర్తలకు మధ్య తోపులాట జరిగింది. రాఘవాపూర్ కు బయలుదేరిన మాజీ శాసనసభ్యుడు దొమ్మాట రామలింగారెడ్డిని, తెరాస కార్యకర్తలను కూడా పోలీసులు అడ్డుకుని అదుపులోకి తీసుకున్నారు. మాజీ ఎమ్మెల్సీ సత్యనారాయణను కూడా కార్యకర్తలతో పాటు పోలీసులు అరెస్టు చేశారు. ఈ సంఘటనలతో తీవ్ర ఉద్రిక్తత నెలకొంది. తెలుగుదేశం శాసనసభ్యుడు మైనంపల్లి హనుమంతరావు కూడా రాఘవాపూర్ కు బయలుదేరారు. దీంతో రాఘవాపూర్ నివురు గప్పిన నిప్పులా ఉంది.