బ్యాంక్ ఆఫ్ మహారాష్ట్రలో అగ్ని ప్రమాదం

హైదరాబాద్: రాష్ట్ర రాజధాని హైదరాబాదులోని కోఠీలో గల బ్యాంక్ ఆఫ్ మహారాష్ట్రలో సోమవారం ఉదయం భారీ అగ్ని ప్రమాదం సంభవించింది. పెద్ద యెత్తున మంటలు ఎగిసిపడుతున్నాయి. ఆ ప్రాంతమంతా దట్టమైన పొగలు అలుముకున్నాయి. సమాచారం అందిన వెంటనే అగ్ని మాపక సిబ్బంది అక్కడికి చేరుకుని మంటలను ఆర్పే ప్రయత్నం చేస్తున్నారు.

అయితే మంటలను ఆర్పడానికి అగ్ని మాపక సిబ్బంది చేస్తున్న ప్రయత్నాలకు ఆటంకం ఏర్పడుతోంది. తమ వద్ద తాళం చెవులు లేవంటూ సిబ్బంది బ్యాంక్ ను తెరవడానికి నిరాకరిస్తున్నారు. ఈ ప్రమాదంలో ప్రాణ నష్టమేమీ సంభవించలేదని తెలుస్తోంది. అయితే నష్టం ఏ మేరకు ఉంటుందనేది ఇప్పుడే చెప్పలేమని అధికారులంటున్నారు.