ఆందోళనకరంగా పిఆర్పీ నేత ఉపేంద్ర ఆరోగ్యం

హైదరాబాద్: ప్రజారాజ్యం పార్టీ సీనియర్ నేత, కేంద్ర మాజీ మంత్రి పర్వతనేని ఉపేంద్ర ఆరోగ్య పరిస్థితి ఆందోళనకరంగా ఉంది. ముత్ర పిండాల వ్యాధితో తీవ్ర అస్వస్థతకు గురై ఆయన హైదరాబాదులోని బంజారాహిల్స్ లో గల స్టార్ ఆస్పత్రిలో చేరారు. నాలుగు రోజులుగా ఆయన చికిత్స పొందుతున్నారు.

పర్వతనేని ఉపేంద్ర ప్రజారాజ్యం అధినేత చిరంజీవి, విజయవాడ పార్లమెంటు సభ్యుడు లగడపాటి రాజగోపాల్, సినీ నటుడు మురళీమోహన్ పరామర్శించారు. పర్వతనేని ఉపేంద్ర కేంద్ర, రాష్ట్ర రాజకీయాల్లో కీలక పాత్ర పోషించారు. తొలుత తెలుగుదేశంలో పనిచేసిన ఉపేంద్ర తర్వాత కాంగ్రెసులో చేరారు. కేంద్ర మంత్రిగా పనిచేశారు. అనంతరం ఆయన ప్రజారాజ్యం పార్టీలో చేరారు.