మా హయంలోనే హైదరాబాద్ అభివృద్ది: బాబు

హైదరాబాద్: హైదరాబాద్ అభివృద్ధి అంతా తమ ప్రభుత్వ హయాంలోనే జరిగిందని తెలుగుదేశం పార్టీ అధ్యక్షుడు నారా చంద్రబాబు నాయుడు అన్నారు. గ్రేటర్ హైదరాబాద్ ఎన్నికల ప్రచారంలో భాగంగా ఆయన మంగళవారం ధూల్ పేటలో రోడ్ షో నిర్వహించారు. కాంగ్రెసు ప్రభుత్వం హైదరాబాద్ అభివృద్ధిని నిర్లక్ష్యం చేసిందని ఆయన విమర్శించారు. సమస్యల పరిష్కారం కోసం తమ పార్టీ అభ్యర్థులకు ఓటేయాలని ఆయన ప్రజలకు విజ్జప్తి చేశారు. కాంగ్రెసు ప్రభుత్వంపై ఆయన తీవ్రంగా విమర్శలు చేశారు.

హైదరాబాదులో పారిశుద్ధ్యం అధ్వాన్నంగా ఉందని, దోమలు పెరిగి ప్రజలు డెంగీ వ్యాధితో బాధపడుతున్నారని, వివిధ రోగాల బారిన పడుతున్నారని ఆయన అన్నారు. నిత్యావసర సరుకుల ధరలు, కూరగాయల ధరలు పెరిగి పేద, మధ్యతరగతి ప్రజల జీవితం దుర్భరంగా మారిందని ఆయన అన్నారు. చిన్నా చితకా పార్టీలకు ఓటేస్తే మురిగిపోతుందని ఆయన చెప్పారు. తెలుగుదేశం పార్టీకి ఓటేసి గెలిపిస్తే హైదరాబాదును మరింతగా అభివృద్ధి చేస్తామని ఆయన చెప్చారు.