జూనియర్ డాక్టర్లకు హైకోర్టు హెచ్చరిక

హైదరాబాద్: తమకు ఉపకార వేతనం పెంచాలని డిమాండ్ చేస్తూ జూనియర్ డాక్టర్లు చేస్తున్న సమ్మెపై రాష్ట్ర హైకోర్టు మంగళవారం తీవ్రంగా ప్రతిస్పందించింది. సమ్మె విరమించకపోతే ప్రభుత్వం జోక్యం చేసుకుని జూనియర్ డాక్టర్ల వైద్య అర్హతను రద్దు చేయించాలని హైకోర్టు ప్రభుత్వానికి సూచించింది. జూనియర్ డాక్టర్లకు సమ్మె చేసే హక్కు లేదని, సమ్మె విరమించాల్సిందేనని స్పష్టం చేసింది. తదుపరి విచారణను బుధవారానికి వాయిదా వేసింది.

డిగ్రీలు రద్దు చేసినా, తమపై ఎస్మా ప్రయోగించినా సమ్మె విరమించబోమని జూనియర్ డాక్టర్లు మొండికేస్తున్నారు. జూనియర్ డాక్టర్లు తమ సమ్మెను ఉధృతం చేశారు. గత ఐదు రోజాలుగా ఆమరణ నిరాహార దీక్ష చేస్తున్న జూనియర్ డాక్టర్ల పరిస్థితి విషమిస్తోంది. తమను అరెస్టు చేయడానికి పోలీసులు వస్తే ఆత్మార్పణ చేసుకుంటామని వారు హెచ్చరిస్తున్నారు.