పదవి వదిలేందుకు రాజ్ నాథ్ రెడీ

న్యూఢిల్లీ: బిజెపి అధ్యక్ష పదవిని అవసరమైతే గడువు కన్నా ముందే వదిలేయడానికి రాజ్ నాథ్ సింగ్ వెనకాడడం లేదు. మంగళవారం ఆయన మాటల్లో ఈ విషయం స్పష్టమైంది. తన వారసుడిపై త్వరగా తేలిస్తే ముందుగానే పదవిని వదిలేయడానికి ఆయన సిద్ధపడుతున్నారు. రాజ్ నాథ్ సింగ్ అధ్యక్ష పదవికి పదవీకాలం డిసెంబర్ 31వ తేదీతో ముగుస్తోంది. తన పదవీ కాలం దాదాపుగా అయిపోయిందని, తన వారసుడి ఎంపిక త్వరగా జరగాలని రాజ్ నాథ్ సింగ్ అన్నారు.

ఆయన వారసుడిగా మహారాష్ట్ర బిజెపి చీఫ్ నితిన్ గడ్కరీని ఆర్ఎస్ఎస్ ఎంపిక చేసినట్లు వార్తలు వస్తున్న నేపథ్యంలో రాజ్ నాథ్ సింగ్ తన పదవిని వదిలేయడానికి సిద్ధపడ్డారు. తన బాధ్యతలను తన వారసుడికి అప్పగిస్తానని ఆయన అన్నారు. అధ్యక్ష పదవి నుంచి తప్పుకోవడానికి తాను తేదీని ఖరారు చేసుకోలేదని ఆయన చెప్పారు. పార్టీ ఏకాభిప్రాయానికి వచ్చి తీసుకునే నిర్ణయానికి తాను కట్టుబడి ఉంటానని ఆయన చెప్పారు.సంస్థాగత ఎన్నికల సాధ్యమైనంత త్వరగా జరుగుతాయని, ఈ విషయంలో ఏ విధమైన జాప్యం జరగదని ఆయన చెప్పారు.