సచిన్ వివాదం: మనోజ్ తివారీ ఇంటిపై దాడి

ముంబై: బోజ్ పురి నటుడు, గాయకుడు మనోజ్ తివారీ ఇంటిపై దాదాపు 15 నుంచి 20 మంది శివసేన కార్యకర్తలు సోమవారం రాత్రి దాడి చేశారు. రాత్రి 9 గంటల ప్రాంతంలో ఒక గుంపు ఇంటికి వచ్చి తాము నటుడిని కలవాలని అనుకుంటున్నామని చెప్పారని తివారీ అధికార ప్రతినిధి శశికాంత్ సింగ్ చెప్పారు. తివారీ ఇంట్లో లేరని చెప్పగానే ఇంటిపై శివసేన కార్యకర్తలు రాళ్లతో దాడి చేశారని, ముంబై విడిచి వెళ్లాలని మనోజ్ తివారీకి వ్యతిరేకంగా నినాదాలు చేశారని ఆయన వివరించారు.

సచిన్ టెండూల్కర్ పై బాల్ థాకరే చేసిన వ్యాఖ్యలను మనోజ్ తివారీ తప్పు పట్టారని శివసేన కార్యకర్తలు ఆగ్రహం వ్యక్తం చేశారు. థాకరే - టెండూల్కర్ వివాదంపై తానేమీ వ్యాఖ్యలు చేయలేదని తివారీ స్పష్టం చేశారు. మనోజ్ తివారీ ఇంటిపై దాడి చేసిన శివసేన కార్యకర్తలపై వెర్సోవా పోలీసు స్టేషనులో కేసు నమోదైంది. శివసేన కార్యకర్తలను పోలీసులు అరెస్టు చేశారు.