హెడ్లీతో ఆర్తి చాబ్రీయా చెట్టాపట్టాల్?

ముంబై: లష్కరే తోయిబా మాస్టర్ మైండ్ డేవిడ్ కొలెమన్ హెడ్లీతో బాలీవుడ్ నటి ఆర్తీ చాబ్రియా చెట్టాపట్టాల్ వేసుకుని తిరిగినట్లు ఊహాగానాలు చెలరేగుతున్నాయి. హెడ్లీతో ఆర్తి ఛాబ్రియా సంబంధాలపై జాతీయ దర్యాప్తు సంస్థ (ఎన్ఐఎ) దర్యాప్తు చేస్తున్నట్లు ముంబైకి చెందిన మిడ్ డే ఒక వార్తా కథనాన్ని ప్రచురించింది. హెడ్లీ ఓషో సంబంధాలపై కూడా సంస్థ దర్యాప్తు చేస్తున్నట్లు ఆ పత్రిక రాసింది. ఒక పార్టీలో రాహుల్ భట్ ఛాబ్రియాను హెడ్లీకి పరిచయం చేసినట్లు సమాచారం. హెడ్లీ ఆర్తి ఛాబ్రియా తరుచూ కలుసుకుంటూ నగరంలో సంచరించేవారని ఆ పత్రిక రాసింది. ఆర్తి చాబ్రియా రాజా భయ్యా, షూటవుట్, అనామిక, ధూమా ధడకా వంటి చిత్రాల్లో నటించింది.

హెడ్లీతో సంబంధాలపై ఎన్ఐఎ ఐదుగురు బాలీవుడ్ ప్రముఖులను ప్రశ్నించినట్లు సమాచారం. ఉగ్రవాద సంబంధాలపై బాలీవుడ్ ప్రముఖుల వాంగ్మూలాలు తీసుకుంటామని కేంద్ర హోం శాఖ కార్యదర్శి జికె పిళ్లై చెప్పారు. ఛాబ్రియా మిత్రుడు ఖలీద్ ను సంస్థ అధికారులు ప్రశ్నించినట్లు తెలుస్తోంది. వీసా కోసం 2007లో ఖలీద్ హెడ్లీ సాయం కోసం తీవ్రంగా ప్రయత్నించినట్లు తెలుస్తోంది. అయితే తాను హెడ్లీని కలవలేదని అతను చెప్పాడు. ఎమ్రాన్ హష్మీ, సోహా అలీఖాన్ సెట్స్ లో హెడ్లీని కలిసినట్లు తెలుసుకున్న దర్యాప్తు సంస్థ అధికారులు వారి ఫోన్ రికార్డులను పరిశీలిస్తున్నారు.

తాను హెడ్లీని కలిసినట్లు వచ్చిన వార్తలను ఆర్తి ఛాబ్రియా ఖండించింది. హెడ్లీ నివాసం ఉన్న శ్యాం నివాస్ కు కొద్ది బ్లాక్ ల దూరంలోనే తాను ఉంటున్నానని, అయితే హెడ్లీని తాను చూడలేదని ఆమె చెప్పింది. హెడ్లీతో పాటు రాహుల్ భట్ ఒకే జిమ్ కు వెళ్తున్నట్లు కూడా తనకు తెలియదని ఆమె వివరించింది.