కెసిఆర్ ఆమరణ దీక్షపై పిటిషన్ డిస్మిస్

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె చంద్రశేఖర రావు ఆమరణ నిరాహార దీక్షను అడ్డుకోవాలంటూ దాఖలైన పిటిషన్ ను రాష్ట్ర హైకోర్టు బుధవారం డిస్మిస్ చేసింది. తెరాస అధ్యక్షుడు కెసిఆర్ నిరాహార దీక్షను అడ్డుకోవాలంటూ హైకోర్టులో పిటిషన్ దాఖలైంది. కెసిఆర్ ఈ నెల 29వ తేదీ నుంచి మెదక్ జిల్లా సిద్ధిపేటలో ఆమరణ నిరాహార దీక్ష చేపట్టాలని నిర్ణయించుకున్నారు. తెలంగాణ రాష్ట్ర సాధనకు ఆయన ఈ దీక్షకు పూనుకుంటున్నారు.

సిద్ధిపేటలో కెసిఆర్ ఆమరణ నిరాహార దీక్షా శిబిరం కోసం ఏర్పాట్లు జరుగుతున్నాయి. తగిన భద్రతా ఏర్పాట్లతో ఈ ఏర్పాట్లు జరుగుతున్నాయి. తన ప్రాణం పోయినా దీక్ష ఆగదని కెసిఆర్ మంగళవారం సాయంత్రం మీడియా ప్రతినిధులతో అన్నారు. తాటాకు చప్పుళ్లకు తాము బెదిరేది లేదని ఆయన అన్నారు. తనను అరెస్టు చేసి దీక్షను ఆపాలనుకోవడం అవివేకమని ఆయన అన్నారు.