సల్మాన్ కు యువతి చెంప పెట్టు

ముంబై: బాలీవుడ్ కండల వీరుడు సల్మాన్ ఖాన్ మరో సారి వివాదంలో చిక్కుకున్నాడు. అతన్ని ఓ బిల్డర్ కూతురు చెంపపై కొట్టింది. పలువురు చిత్ర ప్రముఖులు పాల్గొన్న కార్యక్రమంలో మోనికా అనే యువతి తనను చెంపపై కొట్టడంతో సల్మాన్ అవాక్కయ్యాడు. అయితే అతను దానిపై తీవ్రంగా ప్రతిస్పందించకుండా ఆ యువతిని బయటకు పంపించేయాలని బాడీ గార్డులకు సూచించాడు. సంజనా జోన్స్ ఫేషన్ షో విజయాన్ని పురస్కరించుకుని ఢిల్లీలో ఏర్పాటైన ఒక ప్రైవేట్ పార్టీలో ఈ సంఘటన మంగళవారం అర్థరాత్రి దాటిన తర్వాత జరిగింది.

బుధవారం తెల్లవారు జాము వరకు జరిగిన పార్టీలోకి మోనికా తన పురుష మిత్రుడితో కలిసి బలవంతంగా ప్రవేశించడానికి ప్రయత్నించిందని, తాగిన మత్తులో పెద్గగా అరుస్తూ అదుపు తప్పి వ్యవహరించసాగిందని, ద్వారం దగ్గర ఉన్న సోహైల్ ఖాన్ హంగామా అంతా చూస్తూ ఆ మహిళను పంపించివేయాలని సెక్యూరిటీ గార్జులకు సూచించారని సంబంధిత వర్గాలు చెప్పాయి.

ఈలోగా సల్మాన్ ఖాన్ అక్కడికి చేరుకున్నాడని, ఆమె అసభ్యంగా ప్రవర్తిస్తూ తన సంబంధాల గురించి ఏకరువు పెడుతూ సుస్మితా సేన్ ను దుర్భాషలాడిందని, అక్కడి నుంచి వెళ్లిపోవాలని సల్మాన్ మర్యాదపూర్వకంగా చెప్పాడని, అకస్మాత్తుగా ఆమె సల్మాన్ పై చేయి చేసుకుందని అంటున్నారు.