తెలుగు హీరోల్లో మగాళ్లు లేరు: తమ్మారెడ్డి

హైదరాబాద్: తెలుగు సినిమా హీరోలపై ప్రముఖ నిర్మాత తమ్మారెడ్డి భరద్వాజ సంచలన వ్యాఖ్యలు చేశారు. తెలుగు హీరోల్లో మగాళ్లు లేరని ఆయన వ్యాఖ్యానించారు. బాలల చలన చిత్రోత్సవాల సందర్భంగా ఆయన బుధవారం మీడియా ప్రతినిధులతో మాట్లాడారు. తెలుగులో దమ్మున్న హీరోలు లేరని ఆయన అన్నారు. బాలీవుడ్ లో దమ్మున్న హీరోలున్నారని, వారు ఏ స్క్రిప్టునైనా ఆమోదిస్తారని ఆయన అన్నారు.

అమీర్ ఖాన్ లా తారే జమీన్ పర్ వంటి సినిమాల్లో చేసేవారు తెలుగులో ఉన్నారా, అటువంటి సినిమాను అంగీకరిస్తారా అని ఆయన అడిగారు. తారే జమీన్ పర్ సినిమాలాంటిది తెలుగు హీరోలు చేయబోరని ఆయన అన్నారు. తెలుగులోనే కాదు, ఇతర భాషల్లో కూడా బాలల చిత్రాలు రావడం లేదని ఆయన అన్నారు. సినిమా నిర్మాణం డబ్బుతో కూడిన వ్యాపారం కాబట్టి ప్రయోజనాత్మక చిత్రాలు రావడం లేదని ఆయన అన్నారు.