మేం బలహీనపడినట్లు కాదు: చిరంజీవి

హైదరాబాద్: గ్రేటర్ హైదరాబాద్ ఎన్నికల్లో తాము కాంగ్రెసుతో పొత్తుకు సిద్ధపడినంత మాత్రాన తమ పార్టీ బలహీనపడినట్లు కాదని ప్రజారాజ్యం పార్టీ అధినేత చిరంజీవి అన్నారు. తమ పార్టీ కార్యకర్తలు ఉత్సాహపడినందుననే తాము కాంగ్రెసు పార్టీతో పొత్తుకు సిద్ధపడ్డామని ఆయన గురువారం చెప్పారు. ఇక నుంచి స్లో అండ్ స్టడీ పద్ధతిలో పార్టీని బలోపేతం చేస్తామని ఆయన చెప్పారు. ఆయన గురువారం శేర్ లింగంపల్లి తదితర ప్రాంతాల్లో ప్రచారం నిర్వహించారు.

తమ పార్టీ నిర్మాణం పూర్తి స్థాయిలో లేకపోవడం వల్లనే గ్రేటర్ హైదరాబాద్ ఎన్నికల్లో పూర్తి స్థాయిలో పోటీ చేయలేకపోతున్నామని, కేవలం 64 డివిజన్లలో మాత్రమే పోటీ చేస్తున్నామని ఆయన చెప్పారు. అభిమానాన్ని ఓటు బ్యాంకుగా మార్చుకోవడంలో తాము విఫలమయ్యామని, ఆ లోపం తమలోనే ఉందని, వాటిని సరిదిద్దుకుంటామని ఆయన చెప్పారు.