ఆస్ట్రేలియాలో భారత దంపతులపై దాడి

మెల్బోర్న్: ఆస్ట్రేలియాలోని మెల్బోర్న్ శివారులో తమపై ముగ్గురు ఆస్ట్రేలియన్లు దాడి చేసినట్లు భారత దంపతులు చెప్పారు. తమపై దాడి చేసినవారిలో ఇద్దరు మహిళలు కూడా ఉన్నట్లు వారు చెప్పారు. ఇనుప రాడుతో, స్టీల్ చైర్ తో తమను కొట్టినట్లు వారు తెలిపారు. దీన్ని వారు జాతి వివక్ష దాడిగానే చూస్తున్నారు. మెల్బోర్న్ కు 19 కిలోమీటర్ల దూరంలో గల బుందారాలో నవంబర్ 14వ తేదీన తమపై దాడి జరిగిందని రోడ్నీ రాజ్, ఆయన భార్య రత్న చెప్పారు.

రాత్రి పదిన్నర గంటల ప్రాంతంలో కుక్క మొరగడంతో తాను తలుపులు తీశానని, ఇద్దరు మహిళలు, ఒక యువకుడు కనిపించారని, వారిని వెళ్లిపోవాల్సిందిగా చెప్పానని రోడ్నీ ఒక భారత టీవీ చానెల్ తో చెప్పారు. అయితే వారు వినకుండా తమపై దాడి చేశారని ఆయన చెప్పారు. మూడు నాలుగు దెబ్బలకు తాను పడిపోయానని అతను చెప్పారు. తనను చంపుతానని యువకుడు బెదిరిస్తూ ఆ తర్వాత కూడా పిడిగుద్దులు గుద్దాడని ఆయన తెలిపారు. తన భార్య పరుగెత్తుకొచ్చిందని, ఆమెపై యువతులు వ్యంగ్య వ్యాఖ్యలు చేస్తూ బట్టలూడదీస్తానని అన్నారని, ఆమెను కాపాడడానికి తాను వెళ్లడంతో వారు మళ్లీ తనను కొట్టారని రోడ్నీ వివరించారు.