గ్రేటర్ లో వైయస్ జగన్ ప్రచారమా?: లగడపాటి

హైదరాబాద్: కడప పార్లమెంటు సభ్యుడు వైయస్ జగన్ స్థాయి నాయకుడు గ్రేటర్ హైదరాబాద్ ఎన్నికల్లో ప్రచారం చేయాల్సిన అవసరం లేదని కాంగ్రెసు పార్లమెంటు సభ్యుడు లగడపాటి రాజగోపాల్ అభిప్రాయపడ్డారు. స్థానిక సంస్థల ఎన్నికల్లో గతంలో దివంగత ముఖ్యమంత్రి వైయస్ రాజశేఖర రెడ్డి ప్రచారం చేయకపోవడాన్ని ఆయన గుర్తు చేశారు. గ్రేటర్ హైదరాబాద్ ఎన్నికల్లో కాంగ్రెసు గెలుస్తుందని ఆయన చెప్పారు.

గ్రేటర్ హైదరాబాద్ మేయర్, డిప్యూటీ మేయర్ పదవులు కాంగ్రెసు పార్టీవేనని ఆయన గురువారం మీడియా ప్రతినిధులతో అన్నారు. గ్రేటర్ హైదరాబాద్ ఎన్నికల్లో కాంగ్రెసు ఎన్ని సీట్లు గెలిచేది తాను త్వరలోనే చెబుతానని ఆయన అన్నారు. లోకసభ, శాసనసభ ఎన్నికల సమయంలో ఆయన తన సర్వే ఫలితాలను విడుదల చేశారు. ఫలితాలు ఆయన సర్వేకు చాలా దగ్గరగా వచ్చాయి.