కడప జిల్లాలో మావోయిస్టు హతం

కడప: కడప జిల్లాలో గురువారం తెల్లవారు జామున జరిగిన ఎన్ కౌంటర్ లో ఒక మావోయిస్టు మృతి చెందాడు. గాలివీడు మండలం ఉమ్మిగుంట వద్ద పోలీసులకు, మావోయిస్టులకు మధ్య దాదాపు 20 నిమిషాల పాటు ఎదురు కాల్పులు జరిగినట్లు చెబుతున్నారు. ఈ ఎదురుకాల్పుల్లో మావోయిస్టు మృతి చెందినట్లు, సంఘటనా స్థలం నుంచి రెండు పిస్టళ్లను స్వాధీనం చేసుకున్నట్లు పోలీసులు తెలిపారు.

ప్రత్యేక దళాలు గాలింపు జరుపుతుండగా మావోయిస్టులు ఎదురు పడ్డారని, ఈ సమయంలో మావోయిస్టులు కాల్పులు ప్రారంభించారని, తాము ప్రతిగా ఎదురు కాల్పులు జరిపామని పోలీసులు చెప్పారు. ఈ ఎదురు కాల్పుల్లో ఒక మావోయిస్టు మృతి చెందగా, ఇద్దరు పారిపోయినట్లు వారు తెలిపారు. ఈ ప్రాంతంలో పోలీసులు గాలింపు ముమ్మరం చేశారు.