జగన్ కు అనుమతి అక్కర్లేదు: డిఎస్

హైదరాబాద్: గ్రేటర్ హైదరాబాద్ ఎన్నికల్లో ప్రచారం చేయడానికి కడప పార్లమెంటు సభ్యుడు వైయస్ జగన్ కు ఎవరి అనుమతి కూడా అవసరం లేదని ప్రదేశ్ కాంగ్రెసు కమిటీ (పిసిసి) అధ్యక్షుడు డి.శ్రీనివాస్ అన్నారు. ప్రచారం చేయడానికి ఎవరికి కూడా ప్రత్యేకంగా అనుమతి అవసరం లేదని, పార్టీ గెలవాలని భావించే ఎవరైనా ప్రచారం చేయవచ్చునని ఆయన గురువారం మీడియా ప్రతినిధుల సమావేశంలో చెప్పారు. జగన్ రేపటి నుంచి ప్రచారం సాగిస్తారని ఆయన చెప్పారు.

యువకులు ఎఐసిసి ప్రధాన కార్యదర్శి రాహుల్ గాంధీని ఆదర్శంగా తీసుకోవాలని ఆయన పరోక్షంగా జగన్ కు సూచించారు. రాహుల్ చూసి యువకులు నేర్చుకోవాలని ఆయన అన్నారు. యువతరం రాహుల్ గాంధీని చూసి నేర్చుకోవాలని కాంగ్రెసు సీనియర్ నేత విహెచ్ హనుమంతరావు కూడా అన్నారు. ప్రజలకు సేవ చేయడానికి తండ్రి రాజీవ్ గాంధీ అడుగుజాడల్లో రాహుల్ నడుస్తున్నారని ఆయన అన్నారు.