కెసిఆర్ కూతురు కవిత అరెస్టు

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కూతురు కవితను పోలీసులు శనివారంనాడు అరెస్టు చేశారు. ఉస్మానియా విశ్వవిద్యాలయంలో విద్యార్థుల ఆందోళనకు మద్దతుగా పాదయాత్ర చేపట్టిన కవితను, మరో 70 మందిని పోలీసులు అదుపులోకి తీసుకుని మలక్ పేట పోలీసు స్టేషన్ కు తరలించారు. అంతకు ముందు ఉస్మానియా విశ్వవిద్యాలయంలో విద్యార్థులు తరగతులు బహిష్కరించి ర్యాలీ నిర్వహించారు.

ర్యాలీ నిర్వహించిన విద్యార్థులను పోలీసులు అరెస్టు చేశారు. విద్యార్థులకు మద్దతుగా కవిత పాదయాత్ర చేపట్టారు. దీంతో ఆమెను అరెస్టు చేశారు. ఈ అరెస్టుల తర్వాత కూడా విద్యార్థుల ఆందోళన విశ్వవిద్యాలయంలో సాగింది. దీంతో ఉస్మానియా విశ్వవిద్యాలయం దద్ధరిల్లింది. విద్యార్థుల ఆందోళనతో తీవ్ర ఉద్రిక్తత నెలకొంది. శాంతియుతంగా ర్యాలీ నిర్వహిస్తున్న తమను పోలీసులు అరెస్టు చేశారని విద్యార్థులు విమర్శించారు. అరెస్టులు, లాఠీచార్జీలతో తమ ఆందోళనను ఆపలేరని వారన్నారు.