లిహర్హాన్ నివేదికపై పార్లమెంటులో రభస

న్యూఢిల్లీ: బాబ్రీ మసీదు కూల్చివేతపై ఏర్పాటైన లిబర్హాన్ కమిషన్ నివేదికపై సోమవారం పార్లమెంటులో తీవ్ర దుమారం చెలరేగింది. కమిషన్ నివేదికను వెంటనే పార్లమెంటులో వెంటనే ప్రవేశపెట్టాలని బిజెపి అగ్రనేత అద్వానీ డిమాండ్ చేశారు. ప్రభుత్వం పద్ధతి ప్రకారం కావాలని నివేదికలోని భాగాలను మీడియాకు విడతలవారీగా విడుదల చేస్తోందని బిజెపి ఆరోపించింది. ప్రశ్నోత్తరాల సమయాన్ని రద్దు చేసి నివేదిక లీక్ పై చర్చ చేపట్టాలని అద్వానీ డిమాండ్ చేశారు. నివేదిక అంశాలు బయటపడడం తనను ఆశ్యర్యానికి గురి చేసిందని ఆయన అన్నారు. బాబ్రీ కూల్చివేత జరిగిన రోజు తన జీవితంలో అత్యంత దుర్దినమని తాను లిబర్హాన్ కమిషన్ తో చెప్పినట్లు ఆయన తెలిపారు.

లిబర్హాన్ కమిషన్ నివేదికను సభ ముందు పెట్టకముందే దానిలోని విషయాలు బయటపడడం దురదృష్టకరమని ఆయన అన్నారు. నివేదిక అంశాలు ఎలా వెల్లడయ్యాయో వివరించాలని ఆయన డిమాండ్ చేశారు. రాజ్యసభలోనూ లిబర్హాన్ కమిషన్ నివేదిక లీక్ పై గందరగోళం చెలరేగింది. చర్చ జరగాల్సిందేనని ఎంపిలు స్పీకర్ పోడియాన్ని చుట్టుముట్టారు. దాంతో సభ మధ్యాహ్నం 12 గంటల వరకు వాయిదా పడింది.