పెళ్ళికి నిరాకరించి ప్రేమికుడి ఆత్మహత్య

వరంగల్: పెళ్ళి మంత్రాలు, భాజాలు విన్పించవలసి ఆ రెండు ఇళ్ళల్లో మృత్యువు కరాళ నృత్యం చేసింది. యువతి తండ్రి శనివారం ఆందోళనకు గురై గుండెపోటుతో మృతిచెందగా తల్లిదండ్రుల ఒత్తిడితో ప్రేమించిన ప్రియురాలిని కాదని, మరో యువతిని పెళ్లిచేసుకోవాల్సి రావడంతో ఆ యువకుడు ఆదివారం ఆత్మహత్య చేసుకున్నాడు. ఈ విషాద సంఘటన వరంగల్‌ జిల్లా చెన్నారావుపేట మండలం తిమ్మరాయనిపహడ్‌లో జరిగింది. తిమ్మరాయనిపహడ్‌ వాసి రాజు నాలుగేళ్లుగా ఓ యువతిని ప్రేమించాడు. ఇటీవల తల్లిదండ్రుల ఒత్తిడి మేరకు దగ్గరి బంధువైన మరో అమ్మాయితో పెళ్లి నిశ్చయమైంది. ఆదివారం వివాహం జరగాల్సి ఉంది.

ఇంతలో ఆ యువతి తండ్రి తన కూతురును మోసం చేశాడని రాజుపై పోలీస్టేషన్‌లో కేసు పెట్టాడు. తదుపరి తన కూతురు గురించి ఆలోచిస్తుండగా గుండెపోటు వచ్చి స్వగ్రామం గూడూరు మండలం భూపతిపేటలో మృతిచెందాడు. తల్లిదండ్రుల మాట మీరలేక, ప్రేమించిన అమ్మాయిని పెళ్లిచేసుకోక రాజు మనస్థాపానికి గురై మరో నాలుగు గంటల్లో పెళ్లిజరగాల్సి ఉండగా పురుగుల మందు తాగి ఆత్మహత్య చేసుకున్నాడు.