కెసిఆర్ దీక్ష మానుకుంటే మంచిది: కేశవరావు

తిరుపతి: గ్రేటర్ హైదరాబాద్ ఎన్నికల్లో కాంగ్రెసు గెలిచి తీరుతుందని కాంగ్రెసు సీనియర్ నేత కె.కేశవరావు ధీమా వ్యక్తం చేశారు. ఆయన మంగళవారం తిరుమల శ్రీవేంకటేశ్వర స్వామిని దర్శించుకున్నారు. ఈ సందర్బంగా ఆయన మీడియా ప్రతినిధులతో మాట్లాడారు. దైవ దర్సనానికి వచ్చినందున తాను రాజకీయాలు మాట్లాడదలుచుకోలేదని ఆయన చెప్పారు. అయితే మీడియా ప్రతినిధులు ఆయనను వదిలిపెట్టలేదు. గ్రేటర్ హైదరాబాద్ ఎన్నికల గురించి అడిగారు.

గ్రేటర్ హైదరాబాద్ ఎన్నికల్లో కాంగ్రెసు అతి పెద్ద పార్టీగా అవతరిస్తుందని, ఇందులో సందేహం లేదని ఆయన అన్నారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఆమరణ నిరాహార దీక్షను విరమించుకుంటే మంచిదని ఆయన సలహా ఇచ్చారు. తెలంగాణ రాష్ట్ర సాధనకు అందరం కలిసి పనిచేద్దామని ఆయన కెసిఆర్ కు సూచించారు.