నేను ఉంటానో, ఉండనో..: కెసిఅర్

హైదరాబాద్: తాను ఉంటానో, ఉండనో అని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అన్నారు. గురువారం సాయంత్రం కరీంనగర్ కు బయలుదేరే ముందు ఆయన మీడియా ప్రతినిధులతో మాట్లాడారు. తెలంగాణ తల్లి భవన్ లోని తెలంగాణ తల్లి విగ్రహానికి పూలమాల వేసి నివాళులు అర్పించిన అనంతరం ఆయన కరీంనగర్ కు బయలుదేరుతూ ఆయన మీడియాతో మాట్లాడారు. తాను మీడియాతో మాట్లాడడం ఇది చివరిసారి కావచ్చునని, తాను ఉంటానో ఉండనో ఆయన అన్నారు. తాను ఉన్నా లేకున్నా తెలంగాణ ప్రయోజనాలకు అనుగుణంగా మీడియా వ్యవహరించాలని ఆయన సూచించారు.

ఎన్ని అడ్డంకులు ఎదురైనా అనుకున్నది అనుకున్నట్లుగా చేస్తానని, ఈ నెల 29వ తేదీన ఆమరణ నిరాహార దీక్ష ప్రారంభిస్తానని ఆయన చెప్పారు. రెండు రోజుల పాటు కరీంనగర్ లో విశ్రాంతి తీసుకుని సిద్ధిపేటకు బయలుదేరి వెళ్లి దీక్ష ప్రారంభిస్తానని ఆయన చెప్పారు. ఇది పార్టీలకోసమో, రాజకీయాల కోసమో సాగుతున్న ఉద్యమం కాదని, తెలంగాణ ప్రయోజనాల కోసం సాగుతున్న ఉద్యమమని ఆయన అన్నారు. కాగా, కెసిఆర్ ను దీక్షకు ముందే అరెస్టు చేయడానికి పోలీసులు సమాయత్తమైనట్లు తెలుస్తోంది. అయితే తనను పోలీసులు ఎక్కడ అరెస్టు చేస్తే అక్కడే దీక్షను సాగిస్తానని ఆయన ఇదివరకు మీడియా ప్రతినిధులతో చెప్పారు.