ఎపి రాజకీయాల్లోకి వస్తా: జయప్రద

విజయనగరం: రాష్ట్రంలో తమ పార్టీని నెలకొల్పి బలోపేతం చేయడానికి కృషి చేస్తానని సమాజ్ వాదీ పార్టీ పార్లమెంటు సభ్యురాలు, సినీ నటి జయప్రద చెప్పారు. ఒక కార్యక్రమంలో పాల్గొనడానికి వచ్చిన ఆమె మీడియా ప్రతినిధులతో మాట్లాడారు. ఉత్తరప్రదేశ్ ప్రజలు తనను అదరించి రెండోసారి పార్లమెంటుకు ఎన్నుకున్నారని ఆమె చెప్పారు. ఎన్నికలకు ఇంకా చాలా సమయం ఉందని, ఈలోగా తమ పార్టీని ఇక్కడ నెలకొల్పి బలోపేతం చేయడానికి పనిచేస్తానని ఆమె అన్నారు.

మంచి కథ దొరికితే మళ్లీ సినిమాల్లో నటించడానికి సిద్ధంగా ఉన్నట్లు ఆమె చెప్పారు. సాగర సంగమంలాంటి సినిమా తెలుగులో రావాల్సిన అవసరం ఉందని ఆమె అన్నారు. ప్రస్తుతం తెలుగు సినిమాల్లో నటిస్తున్న హీరోయిన్లెవరూ తెలుగువారు కారని, అందువల్ల తెలుగు సినీ పరిశ్రమలో నిలదొక్కుకోలేకపోతున్నారని ఆమె అన్నారు.