బాబు మాటలు దెయ్యాల వేదాలు: డిఎల్

హైదరాబాద్: గనుల తవ్వకాలపై తెలుగుదేశం పార్టీ అధ్యక్షుడు నారా చంద్రబాబు నాయుడు మాట్లాడడం దెయ్యాలు వేదాలు వల్లించినట్లేనని కాంగ్రెసు శాసనసభ్యుడు డిఎల్ రవీంద్రా రెడ్డి వ్యాఖ్యానించారు. స్వప్రయోజనాల కోసమే చంద్రబాబు గనుల వ్యవహారాన్ని రాజకీయం చేస్తున్నారని ఆయన శనివారం మీడియా ప్రతినిధుల సమావేశంలో అన్నారు. రాజకీయ లబ్ధి పొందడానికే చంద్రబాబు ఢిల్లీలో మకాం వేసి జాతీయ నాయకులతో చర్చలు జరుపుతున్నారని ఆయన అన్నారు.

తెలంగాణ రాష్ట్ర సమితి (తెరాస) దీక్ష వల్ల 1969 నాటి పరిస్థితులు తలెత్తుతాయని అనుకోవడం అపోహ మాత్రమేనని ఆయన అన్నారు. కాంగ్రెసు లెజిస్లేచర్ పార్టీ (సిఎల్పీ) నేతను ఎన్నుకునే బాధ్యతను పార్టీ అధిష్టానానికి కట్టబెడుతూ ఒక పార్లమెంటు సభ్యుడు తీర్మానం ప్రతిపాదించడం రాష్ట్ర చరిత్రలో ఇదే తొలిసారి అని ఆయన అన్నారు. తీర్మానాన్ని కడప పార్లమెంటు సభ్యుడు వైయస్ జగన్ ప్రతిపాదించిన విషయం తెలిసిందే.