సర్వర్ల మొరాయింపు: క్యాట్ కు బ్రేక్

న్యూఢిల్లీ: తొలిసారి ఆన్ లైన్ ద్వారా తలపెట్టిన క్యాట్ పరీక్షకు తీవ్ర అంతరాయం ఏర్పడింది. తొలి రోజు శనివారం పలు చోట్ల సర్వర్లు పనిచేయకపోవడంతో పరీక్షకు అంతరాయం జరిగింది. బెంగుళూర్, లక్నో, చెన్నై, చండీఘర్ తదితర ప్రాంతాల్లో సర్వర్లు పనిచేయకపోవడంతో అభ్యర్థులు తమ పరీక్షను పూర్తి చేయలేకపోయారు. శనివారం ప్రారంభమైన ఈ పరీక్షలు డిసెంబర్ 7వ తేదీ వరకు జరుగుతాయి. వీరికి తిరిగి పరీక్ష నిర్వరిస్తారా, లేదా తెలియడం లేదు.

పరీక్షను రీషెడ్యూల్ చేయాల్సిన అవసరం లేదని కేంద్ర మానవ వనరుల అభివృద్ధి మంత్రి కపిల్ సిబాల్ అంటున్నారు. తలెత్తిన సమస్యపై ఏం చేయాలనే విషయంపై చర్చించడానికి క్యాట్ కమిటీ అహ్మదాబాదులో గానీ కోల్ కత్తాలో గానీ సమావేశం కానుంది. ఐఐఎంలోని 2 వేల సీట్ల కోసం 2.4 లక్షల మంది పరీక్షకు దరఖాస్తు చేసుకున్నారు. పరీక్ష రాయలేని అభ్యర్థులు తీవ్ర ఆందోళనకు గురవుతున్నారు.