వ్యూహాత్మకంగా కెసీఅర్ అరెస్ట్, ఉద్రిక్తత

కరీంనగర్‌ : తెలంగాణ రాష్ట్ర సాధన కోసం నిరాహారదీక్ష చేపట్టేందుకు సిద్దిపేట బయలుదేరిన తెలంగాణ రాష్ట్రసమితి అధ్యక్షుడు చంద్రశేఖరరావును పోలీసులు అరెస్టు చేశారు. అలుగునూరు కూడలి దగ్గర సిద్దిపేటకు వెళుతున్న కేసీఆర్‌ను పోలీసులు వ్యూహాత్మకంగా వ్యవహరించి అరెస్టు చేశారు.

జనం పెద్దగా లేని అలుగునూరు కూడలి దగ్గర కేసీఆర్‌ వాహానాన్ని పార్టీ శ్రేణుల కాన్వాయ్‌నుంచి చాకచక్యంగా తప్పించారు. దీంతో ఆయన అరెస్టుకు మార్గం సుగమమైంది. కేసీఆర్‌ను అరెస్టు చేసిన పోలీసులు ఆర్టీసీ బస్సులో తీసుకొని వరంగల్‌ వైపుకు తీసుకువెళ్లారు. వరంగల్‌ ఎస్పీ సజ్జనార్‌ కేసీఆర్‌ వెంట ఉన్నారు.

తెరాస అధినేత కేసీఆర్‌ను అరెస్టు చేసిన అలుగునూరు కూడలి వద్ద పరిస్థితులు ఉద్రిక్తంగా ఉన్నాయి. అరెస్టును నిరసిస్తూ వందలాదిమంది కార్యకర్తలు రహదారిపై బైఠాయించారు. ఇదిలావుండగా పార్టీ సిద్దాంతకర్త జయశంకర్‌, మాజీ మంత్రి నాయిని నర్సింహారెడ్డి తదితరులను పోలీసులు అరెస్టు చేశారు.