మరో 24 గంటలు దీక్ష చేయగలరు: వైద్యులు

ఖమ్మం: తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావు మరో 24 గంటలు మాత్రమే దీక్ష చేయగలరని వైద్యులు చెప్పారు. గుంటూరు నుంచి వచ్చిన వైద్యుల బృందం సోమవారం ఉదయం ఖమ్మం సబ్ జైల్లో కెసిఆర్ ఆరోగ్యాన్ని పరీక్షించింది. మరో 24 గంటలు మాత్రమే నిరాహార దీక్ష చేయడానికి కెసిఆర్ ఆరోగ్యం సహకరిస్తుందని వైద్యులు మీడియా ప్రతినిధులతో చెప్పారు. ఈ స్థితిలో మంచి ఆస్పత్రి ఉన్న ప్రాంతానికి కెసిఆర్ ను తరలించడం మంచిదని వారు సలహా ఇచ్చారు.

కెసిఆర్ మందులు కూడా వాడడం లేదని, దాని వల్ల ఆరోగ్యం మరింతగా క్షీణించే ప్రమాదం ఉందని వారు చెప్పారు. కెసిఆర్ ఏ విధమైన ఆహారం గానీ మంచినీళ్లు గానీ తీసుకోవడం లేదని వారు చెప్పారు. ఖమ్మం జైల్లో ఉన్న కెసిఆర్ ను సిపిఐ నాయకుడు పువ్వాడ నాగేశ్వరరావు పరామర్శించారు. కెసిఆర్ విడుదలకు తాము బెయిల్ పిటిషన్ వేయబోమని, కెసిఆర్ విడుదల బాధ్యత ప్రభుత్వానిదేనని తెరాస నాయకుడు హరీష్ రావు అన్నారు.