నన్ను ఇక్కడి నుంచి తరలించండి: కెసిఆర్

ఖమ్మం: తనకు ఇచ్చిన హామీ మేరకు తనను ఖమ్మం జైలు నుంచి హైదరాబాద్ గానీ వరంగల్ గానీ తరలించాలని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కోరారు. ఈ మేరకు ఆయన జిల్లా ఎస్పీకి లేఖ రాసి ఫ్యాక్స్ చేశారు. అయితే శాంతిభద్రతల దృష్ట్యా కెసిఆర్ ను ఇక్కడి నుంచి తరలించడం లేదని పోలీసులు కోర్టులో మెమో దాఖలు చేశారని కెసిఆర్ ను కలిసిన న్యాయవాదులు మీడియా ప్రతినిధులతో చెప్పారు. ఆదివారం సెకండ్ క్లాస్ మెజిస్ట్రేట్ ముందు హాజరు పరిచే సమయంలో తనను వేరే జైలుకు తరలిస్తామని పోలీసు అధికారులు హామీ ఇచ్చారని, ఆ హామీని నిలబెట్టుకోకపోవడం చట్టాన్ని ధిక్కరించడమేనని లాయర్లు అన్నారు.

తనను అరెస్టు చేయడానికి ముందు ఏ విధమైన శాంతిభద్రతల సమస్య తలెత్తలేదని, తనను అరెస్టు చేసిన తర్వాతనే పరిస్థితి ఉద్రిక్తంగా మారిందని కెసిఆర్ అన్నట్లు వారు తెలిపారు. తెలంగాణ కోసం ప్రాణత్యాగానికి, ఆత్మహత్యలకు పాల్పడకూడదని ఆయన ప్రజలకు విజ్ఞప్తి చేశారు. కెసిఆర్ వైద్యులు ఇచ్చిన మందులు ఏవీ వాడడం లేదని వారు చెప్పారు. పార్లమెంటు సభ్యుడికే ఇచ్చిన హామీని నిలబెట్టుకోకుండా న్యాయాన్ని నిరాకరిస్తుంటే సామాన్యుల పరిస్థితేమిటని లాయర్లు విమర్శించారు. కెసిఆర్ కు ఇచ్చిన హామీని అమలు చేయాలని తాము కోర్టులో పిటిషన్ వేస్తున్నట్లు వారు తెలిపారు.