కెసిఆర్ తరలింపునకు హెలికాప్టర్ సిద్ధం

ఖమ్మం: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును ఖమ్మం సబ్ జైలు నుంచి తరలించేందుకు హెలికాప్టర్ ను సిద్ధం చేశారు. హెలికాప్టర్ ద్వారా ఆయనను సోమవారం హైదరాబాదుకు తరలించే అవకాశాలున్నాయి. ఆయనను హైదరాబాదులోని చర్లపల్లి జైలుకు తరలించాలని ప్రభుత్వం యోచిస్తోంది. ఆ తర్వాత సికింద్రాబాద్ లోని గాంధీ ఆస్పత్రికి గానీ నిమ్స్ కు గానీ తరలించే అవకాశాలున్నాయి. మరో 24 గంటల పాటు మాత్రమే కెసిఆర్ దీక్ష చేయగలరని, ఆయన ఆరోగ్యం క్షీణిస్తోందని వైద్యులు చెప్పడంతో ప్రభుత్వం ఈ చర్యలకు దిగింది.

జైల్లో కూడా నిరాహార దీక్ష చేస్తున్న కెసిఆర్ మందులు కూడా తీసుకోవడం లేదని వైద్యులు చెప్పారు. ఏ సౌకర్యాలు లేని ఖమ్మ సబ్ జైల్లో కెసిఆర్ ను పెట్టి అవమానిస్తున్నారనే అభిప్రాయం కూడా బలంగా వినిపిస్తోంది. ఆయన పచ్చి మంచినీళ్లు కూడా ముట్టడం లేదని వైద్యులు చెప్పారు. ఖమ్మంలో మరోసారి కెసిఆర్ ను కోర్టులో ప్రవేశపెట్టిన తర్వాత హైదరాబాదుకు తరలించే అవకాశాలున్నాయి. ఆయనను కోర్టుకు తరలించడానికి పది వాహనాలను సిద్ధం చేశారు. కెసిఆర్ తో వైద్యులు, సిపిఐ నేత పువ్వాడ నాగేశ్వర రావు చర్చలు జరిపారు.