జలగం వెంకటరావు ఆఫీసుపై దాడి

ఖమ్మం: ఖమ్మం జిల్లా సత్తుపల్లిలో కాంగ్రెసు నాయకుడు జలగం వెంకటరావు క్యాంపు కార్యాలయంపై బుధవారం దాడి జరిగింది. క్యాంపు కార్యాలయంలోని ఫర్నీచర్ ను ధ్వంసం చేశారు. కాంగ్రెసు నేత రేణుకా చౌదరి క్యాంపు కార్యాలయంపై దాడి జరిగిన తరుణంలో జలగం వెంకటరావు ఆఫీసుపై దాడి జరగడం గమనార్హం. వీరిద్దరికి జిల్లా పరస్పరం పడదనే విషయం అందరికీ తెలుసు. తన కార్యాలయంపై దాడి జరగడం దురదృష్టకరమని జలగం వెంకటరావు అన్నారు. తాను శాంతియుతంగా ఉన్నా తన కార్యాలయంపై దాడి జరిగిందని ఆయన మీడియా ప్రతినిధులతో అన్నారు.

తన కార్యాలయంపై దాడి చేసినవారు తెలంగాణ రాష్ట్ర సమితి (తెరాస) కార్యకర్తలా, వేరేవాళ్లా అనేది తాను చెప్పలేనని ఆయన అన్నారు. సంఘటనా స్థలంలో తెరాస జెండా ఉండడంపై ప్రశ్నించగా కాంగ్రెసు జెండానైనా ఉండవచ్చు, తెరాస జెండానైనా ఉండవచ్చు, జెండా ఉన్నంత మాత్రాన వారే దాడి చేశారని చెప్పలేమని ఆయన అన్నారు. తనకు ఎవరి మీదా అనుమానాలు లేవని, పోలీసులే ఆ విషయం చూసుకుంటారని ఆయన అన్నారు. తెలంగాణ అంశం ఇప్పటికిప్పుడు పరిష్కారమయ్యేది కాదని ఆయన అన్నారు.