తెలంగాణకు కాంగ్రెసు దగా: జవేదకర్

న్యూఢిల్లీ: తెలంగాణను కాంగ్రెసు పార్టీ దగా చేసిందని బిజెపి సభ్యుడు ప్రకాష్ జవదేకర్ గురువారం రాజ్యసభలో విమర్శించారు. తెలంగాణ రాష్ట్ర ఏర్పాటుకు బిల్లు ప్రవేశపెడితే తాము సమర్థిస్తామని ఆయన చెప్పారు. బిల్లును వెంటనే ప్రవేశపెట్టాలని ఆయన యుపిఎ ప్రభుత్వాన్ని డిమాండ్ చేశారు. తెలంగాణ రాష్ట్రం ఇస్తామని చెప్పి కాంగ్రెసు 2004 ఎన్నికల్లో తెలంగాణ రాష్ట్ర సమితి (తెరాస)తో పొత్తు పెట్టుకుని ఎన్నికల్లో గెలిచిందని ఆయన గుర్తు చేశారు. అయితే కాంగ్రెసు విశ్వాస ఘాతుకానికి పాల్పడిందని ఆయన వ్యాఖ్యానించారు.

తెలంగాణ బిల్లు పెడితే తాము సమర్థిస్తామని అందరి కన్నా ముందు చెప్పామని ఆయన గుర్తు చేశారు. తెలంగాణ రాష్ట్ర ఏర్పాటును గతంలో తెలుగుదేశం పార్టీ వ్యతిరేకించిందని, ఇప్పుడు అందుకు అనుకూలంగా నిర్ణయం తీసుకుందని, పలు పార్టీలు తెలంగాణ రాష్ట్ర ఏర్పాటుకు మద్దతిస్తున్నాయని ఆయన చెప్పారు. తెలంగాణ కోసం ప్రజలు యాభై ఏళ్లుగా పోరాడుతున్నారని ఆయన చెప్పారు. నీళ్ల కోసం, ఉద్యోగాల కోసం తెలంగాణ ప్రజలు తెలంగాణ రాష్ట్రాన్ని కోరుతున్నట్లు ఆయన తెలిపారు.